Gipasidunggan sa Presidential Task Force on Media Security, ang kadaghanan sa mga magsisibya nga anaa panahon sa nahitabong kagubot sa Senado, diin mihatod sa mga balita taliwala sa hulga sa siguradidad og sa ilang kinabuhi niadtong Mayo 13, 2026.
Matud ni Jose Torres Jr. ang Undersecretary sa PTFOMS nga dili sayon ang nahiaguman sa mga magsisibya panahon sa kagubot nga mihatud og balita apan pabilin gihapon sa propesyonalismo, samtang gipanalipdan ang kaugalingon sa posibleng hulga sa kinabuhi.
Sigon niini nga nabalaka ang buhatan sa mental health sa mga mi-cover sulod sa Senate building gumikan kay ubay-ubay kanila ang nakabaton og trauma sa mismong panghitabo.
Hinungdan nga gipamimgkamotan sa Presidential Task Force on Media Security nga makahatag og alibyo sa ilang nasinati nga trauma sama sa pagpahigayon og mental health sessions inabagan sa pipila ka mga sector.
Gipasiugda usab ni Torres, ang panginahanglan sa mas lig-ong proteksyon alang sa mga mamamahayag, ilabina sa mga kababayen-an sa media industry, batok sa nagkadaghang online attacks ug harassment sa social media.
Tumong sa task force mao ang pagpalig-on sa “proactive” nga pamaagi sa pagpanalipod sa mga media workers, imbes nga maghulat na lang sa mga insidente sa pag-atake o pagpamatay.
Matod ni Torres, dakong hagit karon ang online harassment, fake news, misinformation, ug mga hulga nga kasagarang maagian sa mga mamamahayag, ilabina sa mga babaye sa industriya.
Gipasabot usab niya nga ang task force nagpadayon sa pagmonitor ug pag-imbestigar sa mga kaso sa pagpamatay sa mga journalists sukad pa niadtong 1986, apan daghang kaso ang na-archive tungod sa kakulang sa saksi ug kawalay interes sa ubang pamilya sa pagpadayon sa kaso.
Kahinumdoman nga natukod ang Presidential Task Force on Media Security niadtong 2016 pinaagi sa Administrative Order No. 1 ubos sa administrasyon ni kanhi Presidente Rodrigo Duterte aron motabang sa pag-imbestigar ug pagresolbar sa mga kaso sa pag-atake ug pagpamatay sa media workers sa nasud
