Gihimakak ni Sen. Erwin Tulfo ang naunang pamahayag ni Sen. Pia Cayetano nga walay bisan usa nga nangumusta sa mga senador nga natanggong atol sa kagubot sa Senado niadtong Mayo 13, 2026.
Una nga gipagawas ni Sen. Pia Cayetano ang impormasyon diin iyang gisaway nga bisan pa man og kaila na niya ang pipila sa iyang mga kaubang senador sulod sa mga dekada, wala gani sila nangumusta kaniya atol sa kagubot.
Apan sumala ni Sen. Erwin, ang mga miyembro sa minorya nagpahayag og kabalaka usa-usa atol ug pipila ka minuto human sa pinusilay.
Matud niini nga lakip sa mga senador nga miabiabi sa sitwasyon sa mga miyembro sa majority bloc mao sila si Sen. Kiko Pangilinan, Sen. Bam Aquino, Sen. Sherwin Gatchalian, ug uban pang mga miyembro sa bag-ong minorya.
Bisan siya mismo nagpahayag og suporta sa iyang mga kaubang senador nga nahabilin sulod sa Senate compound. Diin giingon nga iyang gipadala ang mensahe sa eksaktong alas 9:50 sa gabii.
Gani, giingong nag-ampo usab siya alang kanila, ug gikataho nga miadto siya sa Simbahan sa Baclaran sa gabii nga nahitabo ang pagpamusil.
Sa laing bahin, si Sen. Tulfo mipadayag sa iyang pagsalig sa nagpadayon nga imbestigasyon sa Senate Committee of the Whole.
Mas maayo matud pa nga ang komite ang mohimo sa imbestigasyon kay ang tanang miyembro sa taas nga balay balauranan siguradong adunay kaugalingong mga pangutana bahin sa kontrobersyal nga pagpamusil sulod sa compound sa Senado.
