CEBU CITY-Gikompirmar ni Brgy. Duljo Fatima Kapitan Elmer Abella nga nakadawat sila og report nga adunay nagpaliga sa may Sitio Bohol Village sa naasoy nga barangay ug dali dayon kini nilang gi-adto.
Apan gitino sa kapitan nga dili barangay ang nagpaliga sukwahi sa nadawat nga report sa Bombo Radyo Cebu nga nagpaliga pa ang barangay bisan paman sa gipatuman nga community quarantine.
Gani, gihimug-atan pa ni Abella nga gipangtangtangan nila og ‘ring’ ang 5 nila ka mga basket court ug gym aron nga wala nay magduwa pa ug mugawas sa ilang balay.
Gipahibaw usab ni Abella nga nagpahigayon sila og roving ilabina nga gipatuman na ang 24 hour curfew alang sa mga batan-on ug mga senior citizen.
Hinoon, gibutyag sa kapitan nga mikooperar sa karon ang iyang mga konstituwente ug dugang pa sa kapitan nga nangita sila karon og paagi nga makasecure usab og mga facemask ug alcohol alang sa mga lumulupyo sa barangay apan babag lang niini ang problema sa supply.
