Opisyal nga mipirma og Memorandum of Understanding (MOU) ang Cebu Provincial Government, uban sa MTD Philippines, Inc. niadtong Martes, Mayo 19, para sa gisugyot nga Satellite Provincial Government Center, Sports and Economic Hub, ug Food Security Center sa Naga City, Cebu.
Gipasiugda ni MTD Philippines President ug CEO Engr. Patrick Nicholas David ang kamahinungdanon sa pakigtambayayong sa mga local government unit nga nagpaluyo sa maayong panggobyerno, nga gikutlo kini nga nahiuyon sa uban pang nagpadayon nga mga proyekto sa kompanya, lakip ang New Pasig City Hall.
Matod ni Engr. David, nakigtambayayong sila sa mga LGU nga dili lang nagsaad apan naghatag usab og maayong panggobyerno, diin giklaro niini nga mao kini ang ilahang kanunay nga gilantaw, ang pagtrabaho uban ang maayong liderato aron makahatag og mga pasilidad nga world-class nga walay korapsyon ug kalapasan.
“We work with LGUs that not only promise but also deliver good governance. This is what we have always envisioned — working with good leadership to deliver world-class facilities free from corruption and wrongdoing. We are fatigued by stories of how bad government projects are. What we promise, we deliver — and always ahead of schedule.”
Subay niini, ang gisugyot nga 45-hectare Satellite Provincial Government Center nagtumong sa pagdala sa mga serbisyo sa provincial government nga mas duol sa mga residente sa Southern Cebu samtang nagtabang sa pagpagaan sa kahuot sa mga urban center.
Apil usab sa proyekto ang pagpalambo sa usa ka Sports Stadium ug Aquatic Center nga adunay kapasidad nga 20,000 ka lingkoranan, usa ka fish port ug fish market, usa ka Food Security Facility, usa ka Renewable Energy Facility, ug usa ka Transport Hub para sa mga ferry ug public utility vehicles (PUV).
Samtang, sa giluwat nga mensahe ni Cebu Governor Pamela Baricuatro, gikanayon niini nga usa sa mga rason nganong iyang gipadayon ang iyang posisyon sa gobyerno mao ang iyang pagtuo nga ang Sugbo angayan sa mas accessible nga mga serbisyo sa gobyerno, mas lig-on nga mga oportunidad sa ekonomiya, mas lapad nga mga luna para sa kalamboan sa kabatan-onan pinaagi sa isports, ug malungtarong mga solusyon para sa seguridad sa pagkaon.
Gipasiugda sa gobernadora ang kamahinungdanon sa Food Security Center, nga namatikdan nga kini makatabang sa pagsulbad sa kawalay seguridad sa pagkaon sa probinsya ug pagpakunhod sa mga pagkawala human sa pag-ani sa mga mag-uuma sa Sugbo.
Ingon ni Baricuatro, ang Food Security Center labi ka importante kaniya tungod kay ang seguridad sa pagkaon kanunay nga usa sa iyahang personal nga mga adbokasiya.
Diin iyang gilatid nga mao kini ang hinungdan nganong nagpadayon sila sa pagduso sa mga programa nga nagpalig-on sa agrikultura, nagsuporta sa mga mag-uuma ug mangingisda, ug nagsiguro nga ang pagkaon magpabilin nga accessible ug malungtaron para sa katawhan.
“The Food Security Center especially means so much to me because food security has always been one of my personal advocacies. This is why we continue pushing programs that strengthen agriculture, support our farmers and fisherfolk, and ensure that food remains accessible and sustainable for our people.”
Sa higayon nga magsugod na ang konstruksyon, ang proyekto gilauman nga makamugna og mga 5,000 ka trabaho atol sa mga hugna sa pag-uswag ug pagkompleto niini.
Ang giplano nga sports hub gilauman usab nga magbutang sa Sugbo isip usa ka maayong lugar alang sa mga internasyonal nga kalihokan sa paugnat sa kusog, nga dugang nga magpalambo sa turismo ug kalihokan sa ekonomiya sa probinsya.
