Mipahimangno ang Environmental Management Bureau-7 (EMB-7) sa mga tawo nga sakop sa sensitive groups, lakip na ang mga bata, mga tigulang, ug adunay sakit sa baga o kasingkasing, nga likayan ang taas o bug-at nga kalihokan sa gawas tungod sa posibleng epekto sa kahimsog tungod sa taas nga PM2.5.
Base sa pinakaulahing datos sa monitoring, ang lebel sa PM2.5 sa Dakbayan sa Talisay naa sa kategoryang “Unhealthy for Sensitive Groups,” samtang ang PM10 nagpabilin sa “Fair” nga kalidad sa hangin.
Ang meteorological data sa panahon sa monitoring nagpakita og temperatura nga 30.8 degrees Celsius, hangin nga 2 metros kada segundo ang kusog, ug direksyon sa hangin nga gikan sa east-southeast.
Matud ni Engr. Arthur Niño Calupig, ang Air Monitoring Quality Personnel sa EMB-7 nga ang kadaghanan sa publiko dili kaayo maapektuhan og seryoso, apan girekomendar gihapon ang pag-amping.
Ang PM2.5 nagpasabot sa pinong partikulo sa hangin nga 2.5 micrometers o mas gamay pa, nga makasulod sa lawom nga bahin sa baga ug mahimong hinungdan sa problema sa respiratoryo ug kasingkasing.
Gipahibalo usab sa EMB-7 nga magpadayon ang ilang pagmonitor sa kalidad sa hangin sa Metro Cebu ug magpagawas og updates kung gikinahanglan aron magiyahan ang publiko.
