CEBU CITY-Nasikop sa mga sakop sa Criminal Investigation and Detection Group – Central Visayas (CIDG-7) pinaagi sa operasyon niining “Oplan Salikop” ang usa ka gituohang miyembro sa Communist Terrorist Group (CTG) didto sa Plaza sa Katawhan sa Cebu South Coastal Road ning dakbayan sa Sugbo niadtong adlaw sa Biyernes, Disyembre 13, 2024.
Giila ang dinakpan nga si Marlon Jakosalem alyas “Ka Ar-ar”, 30-anyos og gikan sa Guihulngan, Negros Oriental.
Gikatahong kauban sa iyang kaipon si Jakosalem sa dihang nasikop kini pasado alas 9:30 sa gabii niadtong Biyernes diin nag-atubang sa kasong double murder nga giisyu ni Hon. Judge Rosario Carriaga, ang assisting judge sa Regional Trial Court Branch 64 sa Guihulngan City, Negros Oriental.
Usa ka tracker team gikan sa CIDG Cebu CFU, sa pakig-alayon sa local police units ang nipahigayon og manhunt operation nga gitarget ang mga wanted nga sakop sa CTG nga miresulta sa pagkasikop kaniya.
Ang operasyon gibase sa actionable intelligence gikan sa usa ka ahente nga nadestino sa Philippine Air Force’s Lapu-Lapu City base, nga nagpamatuod sa presensya sa mga wanted nga miyembro sa CTG sa maong lugar.
Atol sa iyang pagdakop niadtong Biyernes, si Jakosalem gipahibalo sa iyang mga katungod sa konstitusyon nga gimando sa balaod og gidala dayon siya sa buhatan sa CIDG Cebu alang sa dokumentasyon ug temporaryong detensyon samtang nagpaabot sa pagbalik sa iyang warrant of arrest ngadto sa nag-isyu nga korte.
