Gideklara sa usa ka taho sa United Nations ang “global state of water bankruptcy.”
Basi sa panukiduki sa UN research institute, nga ang kalibutan misulod sa usa ka panahon sa kakulang sa tubig, diin ang mga suba, lanaw ug mga aquifer o natipig nga tubig sa yuta mas paspas nga nahurot kon itandi sa mapuno sa kinaiyahan.
Gihisgotan sa pagtuon ang mga dekada sa sobra nga paggamit, polusyon, pagkadaot sa kalikopan ug presyur sa klima isip mga hinungdan nga nagduso sa daghang mga sistema sa tubig nga milapas sa punto sa pagkaayo.
Sa usa ka bag-ong report gikan sa UN University Institute for Water, Environment and Health, dili na igo ang paghulagway lang sa bag-ong mga kamatuoran sa mga isyu sa tubig sa tibuok kalibutan isip water stress ug krisis sa tubig.
Giingon usab sa taho nga usa ka dako nga bahin sa mga basang yuta ang nawala sa tibuok kalibutan, nga gibanabana nga 410 milyon nga ektarya, o halos susama kadako sa European Union, ang nawala sa miaging lima ka dekada.
Laing timaan sa pagkabangkarota sa tubig mao ang pagkahurot sa tubig sa yuta, diin 70 porsyento sa mga nag-unang aquifer nga gigamit alang sa tubig nga mainom ug irigasyon mikunhod.
Dugang pa sa problema ang pagbag-o sa klima, nga miresulta sa pagkawala sa kapin 30 porsyento sa mga glacier sa kalibutan sukad niadtong 1970 ug ang seasonal meltwater nga gisaligan sa gatusan ka milyon nga mga tawo.
Samtang, ang pipila ka mga siyentista nag-abiabi sa pagtutok sa mga isyu sa tubig, nagpasidaan sila nga ang deklarasyon sa global water bankruptcy mahimong makawagtang sa pag-uswag nga nahimo sa lokal nga lebel.
