Nangayo ang gobyerno sa China og dugang impormasyon kalabot sa Chinese national nga gidakop niadtong Abril 29, gawas sa Commission on Elections (Comelec) central office.
Matod sa tigpamaba sa Chinese Foreign Ministry nga si Guo Jiakun, ang gobyerno sa China nakig-alayon na sa gobyerno sa Pilipinas aron makakuha og dugang impormasyon kalabot sa isyu.
Ingon man nga subling gihimakak sa opisyal sa China nga nanghilabot ang China sa gikatakdang eleksiyon sa Pilipinas.
Dugang ni Jiakun, ang China nagsunod sa ‘non-interference policy’ o dili pagpanghilabot sa internal nga mga kalihokan sa ubang mga nasud.
Matod niya walay intensiyon ang China nga manghilabot sa eleksyon ug uban pang lokal nga isyu sa Pilipinas.
Sa samang higayon, gipasanginlan ni Jiakun ang pipila ka mga politiko sa nasud nga giingong nagpakaylap sa mga isyu nga may kalabotan sa China dinhi sa Pilipinas.
Bisan og wala hinganli sa opisyal sa China ang mga politiko, iya silang gitambagan nga hunongon na ang pagpakatap sa mga isyu nga may kalabotan sa China ug paghimog walay basehanan nga mga akusasyon alang lang sa ilang personal ug hakog nga interes.
Ang Chinese Embassy sa Manila nipagawas na og opisyal nga pamahayag kalabot sa maong insidente, ug miinsister nga walay interes ang China sa domestic affairs sa Pilipinas.
Matod sa National Bureau of Investigation, ang dinakpan nga Chinese gihinganlan og Tak Hoi Lao, 47 anyos, ug naghupot og tourist visa nga nadakpan siya sa usa ka International Mobile Subscriber Identity (IMSI) catcher, usa ka himan nga makahimo sa pag-intercept sa mga komunikasyon sa telepono sulod sa pipila ka kilometro.
