Tun-an sa gobyerno ang regional tripartite wages ug productivity board, ang hangyo alang sa mas taas nga suholan sa mga mamumuo.
Mao kini ang gipasalig ni Presidente Ferdinand Marcos Jr., nga dili isalikway sa gobyerno ang hangyo alang sa taas nga suholan.
Gipasaligan ni Presidente Marcos ang mga mamumuo nga ang gobyerno naminaw sa ilang mga hangyo ug siguruhon nga matubag sila.
Apan matud sa Presidente nga adunay mga butang nga angay timbang-timbangon sa epekto sa usbaw sa suholan.
Matod pa sa Presidente, ang epekto niini sa paglambo sa negosyo, trabaho, ug ekonomiya sa nasud kinahanglang tagdon.
Dugang pa nga nindot paminawon ang mga tam-is nga saad kalabot sa usbaw sa suholan, apan kinahanglang balansehon.
Gipasigarbo sa Presidente nga 16 ka rehiyon ang nakapatuman na ug usbaw sa sweldo sukad Hunyo sa miaging tuig.
Sa laing bahin, gipaambit sa Presidente ang nagkalain-laing programa sa gobyerno aron matabangan ang atong mga katagilungsod sa ilang pag-antos, ilabi na sa mga galastohan.
