Gihangop ni Cebu Governor Pamela S. Baricuatro ang mga health programs nga gipahibalo atol sa State of the Nation Address (SONA) ni Presidente Ferdinand Marcos Jr., ug miingon nga nahiuyon sa mga prayoridad sa gobyerno sa probinsya, ilabina ang plano niini nga maghatag og rehabilitation therapy para sa mga kabos nga Sugboanon.
Sa usa ka pahayag nga gi-post sa opisyal nga Facebook page saCebu Provincial Government, si Baricuatro miingon nga iyang gidawat ang pipila ka mga punto nga gipataas sa pakigpulong nga nahiuyon sa mga prayoridad sa Sugbo ug sa mga panginahanglanon sa lugar.
Matod niya, ang pag-atiman sa panglawas mao ang iyahang prayoridad, ang pagpalapad sa mga programa sa panglawas, lakip ang Universal Health Care, YAKAP, ug dugang nga coverage sa PhilHealth, usa ka maayong kalamboan.
Gidugang usab niya nga ang pagpalapad sa coverage para sa rehabilitation therapy nahiuyon usab sa plano nga maghatag og rehab therapy para sa mga kabos nga Sugboanon.
“More than anything, since healthcare is my priority, the expansion of health programs, including Universal Health Care, YAKAP, and additional PhilHealth coverage, are a welcome development. “The expansion of coverage for rehabilitation therapy is also in line with our plan to provide rehab therapy for indigent Cebuanos.”
Kahinomdoman nga niadtong Lunes, atol sa SONA ni Presidente Marcos, miingon kini nga ang PhilHealth package para sa mga konsultasyon sa therapy para sa mga batang adunay developmental disabilities doblehon, ug ang gidaghanon sa mga sesyon sa therapy nga masakop, modaghan gikan sa 90 ngadto sa 150.
Subay niini, sa pagtambong usab ni Baricuatro sa SONA sa Presidente, nakadawat kini og mga pagbatikos apan, matod pa sa Gonernadora, wala niya hatagi og pagtagad ang mga batikos nga iyang nadawat tungod kay nagtuo siya nga dili kini gikan sa mga tinuod nga Sugbuanon.
Samtang si Cebu Vice Gov. Glenn Anthony Soco miingon usab nga ang mga lakang para sa micro, small ug medium enterprises, lakip na ang pag-iban sa buhis, exemption gikan sa minimum nga corporate income tax ug ang sugyot nga tangtangon ang mga system loss charges, mga mahinungdanong lakang padulong sa pagpagaan sa pinansyal nga palas-anon sa mga Pilipino.
Ang maong pamahayag niya subay sa gipahibalo usab ni Marcos ang Kongreso nga palapdan ang income tax exemption ngadto sa mga nagkita og dili molapas sa P350,000 kada tuig ug tangtangon ang minimum nga corporate income tax sa gagmay nga mga negosyo.
