PROVINCE OF CEBU- Nagpahigayon og kalit nga inspeksyon si Cebu Governor Pamela Baricuatro sa pipila ka merkado ug supermarket sa Sugbo aron maprotektahan ang mga konsumidor batok sa posibleng pagsaka sa presyo sa mga palaliton tungod sa nagpadayong tensyon sa Middle East.
Gidungan sa gobernador ang pagbisita sa mga Supermarket sa Mandaue City ug Talisay City, ingon man sa Tabunok Public Market gahapon Biyernes, Marso 20.
Matud ni Baricuatro, kabahin kini sa paningkamot sa probinsyal nga gobyerno aron mapugngan ang mga negosyante nga mosakay sa sitwasyon pinaagi sa dili makatarungang pagsaka sa presyo sa mga batakang panginahanglanon.
Sa maong inspeksyon, personal niyang giusisa ang presyo sa mga baligya ug nakig-estorya sa mga tindero aron masiguro nga sakto ang gipaskil nga presyo, ilabi na sa bugas.
Sumala sa gobernador, anaa sa P48 kada kilo ang presyo sa bugas sa merkado.
Gipasabot usab ni Baricuatro nga wala angay ikabalaka sa supply sa bugas sa probinsya.
Dugang pa sa gobernador, gipahibalo sa Department of Agriculture nga adunay igo nga stock sa bugas ang Cebu.
