Habal-habal driver sikop human nakuhaan og pekeng kwarta

Sikop ang usa ka habal-habal driver human nakuhaan og mga counterfeit nga kwarta atol sa entrapment operation sa Brgy. Pajo, sa dakbayan sa Lapu-Lapu.

Giila ang dinakpan nga si Jundel Bardin, alyas Libat, 22 anyos, ug nagpuyo sa Brgy. Mambaling sa dakbayan sa Sugbo.

Sa hiniusang operasyon sa Lapu-Lapu City PNP ug sa Bangko Sentral ng Pilipinas, nasakmit sa mga otoridad ang 17 ka mga pahina sa peke nga 1,000 peso bills ug 16 ka pahina sa peke nga 500-peso bills.

Matud sa nangulo sa operasyon nga si Police Major Rein Magbanua nga nakadawat sila og taho kalabot na sa giingong pagproduce og mga peke nga kwarta hinungdan nga nasikop si Alyas Libat.

Natanggong sa prisuhan ang dinakpan ug kasuhan og ilegal nga paghupot sa mga counterfeit nga kwarta.