CEBU CITY — Padayong gibantayan sa Environment and Management Bureau (EMB)-7 ang nasinating “haze” sa Metro Cebu gumikan sa forest fires sa Indonesia.
Matud sa tigpamaba sa EMB-7 nga si Engr. Cindylyn Pepito nga nabantayan sa ilang monitoring nga milapas sa safe guideline value ang air quality sa pipila ka mga bahin sa Sugbo nakalabay nga mga adlaw.
Kung mahanggap sa tawo ang baga nga aso tungod sa mga pollutants, moresulta kini sa respiratory tract infections ug pagpanakit sa kasingkasing.
Dugang pa ni Pepito nga dili pa nila ma-determine kung kanus-a mawagtang ang nasinating baga nga aso gumikan kay ilang gitan-aw ang mga factors sama lang sa gidaghanon sa uwan, wind direction, ug gikusgon sa hangin.
“Since they are so small and light, PM 2.5 tend to stay longer in the air than heavier particles. This increases the chances of humans and animals inhaling them into the bodies and might bypass the nose and throat and penetrate deep into the lungs. Some may even enter the circulatory system,” sigon pa sa public advisory sa EMB-7.
Hinungdan nga mitambag ang EMB-7 nga mosul-ob og dust mask or eye goggles aron makalikay sa mga air pollutants.
Dugang pa nga tambag ni Pepito nga likayan una ang mga outdoor activities, inay magpabilin sa tagsa-tagsa ka mga panimalay ug sirad-an pirmi ang mga bintana ug pultahan. (GN)
