CEBU CITY-Gi-imbestigaran sa mga sakop sa Cebu City Transportation Office ang usa ka panghitabo nga may kalabotan sa pag-orginisar og usa ka catering set-up sa tunga sa national highway sa Dakbayan sa Sugbo.
Kini nunot sa nikatap nga video sa social media kung diin makita ang mga nakalaray na lamesa ug bangko sa tunga-tunga sa dalan sa national highway sa may Brgy. Bulacao, ug gitapok-an kini og mga nangaon nga taw sama og usa ka ‘dinner party’.
Matod pa sa head sa operation sa CTTO nga si Raquel Arce, wala kini nakadawat og letter request nga aduna silay ipahigayon nga pakaon-kaon sa tunga sa dalan sa Brgy. Bulacao.
Gibutyag ni Arce, nga ang ilahang nakuha nga schedule of activities mao ra ang christmas tree lighting hinungdan nga adunay traffic enforcers nga nagbantay.
Dugang niini, gibutyag usab ni Arce nga pila ra unta ang pagpasiga sa christmas tree lighting apan dili mao ang nahitabo tungod kay adunay bangkiti na ge andam tunga sa dalan nga wala siya kahibalo.
