CEBU CITY-Gimanduan ni Cebu City Police Office (CCPO) Chief Colonel Ireneo Dalogdog ang Traffic Enforcement Unit sa pagsusi sa CCTV footage sa hit-and-run nga insidente nga naglambigit sa 23-anyos nga basketball player nga si Jeslar Larumbe.
Matod ni Dalogdog nga nakig-alayon na sila sa management sa simbahan ug pipila ka mga establisemento sa mga dapit nga agian sa duha ka sakyanan aron makuha ang kopya sa ilang CCTV footages.
Kini aron nga ilang masusi ang CCTV footage aron makonpirmar ang pasangil sa mga drayber.
Nanawagan usab ang opisyal sa responsable nga moduol ug dawaton ang tulubagon sa iyang mga aksyon.
Kung kahinumduman nga si Larumbe nadasmagan sa usa ka sports utility vehicle (SUV) samtang nagsakay sa iyang motorsiklo duol sa Redemptorist Church sa Queensroad sa Barangay Kamputhaw, dakbayan sa Sugbo, niadtong Domingo, Pebrero 4, 2024.
Siya gibiyaan nga nagbuy-od sa karsada human nadasmagan sa SUV nga gikatahong naggamit og siren.
