CEBU – Nagkanayun ang Philippine Drug Enforcement Agency sa Central Visayas (PDEA-7), nga kon adunay kaugalingong thermal incinerator mahimong mapaspasan niini ang pagguba sa mga nasakmit nga ilegal nga drugas.
Mao kini ang gipaabot ni Levi Ortiz, PDEA-7 director, human nipasalig si Cebu Governor Gwendolyn Garcia nga tabangan sila sa pagpalit og thermal incinerator.
Matod ni Ortiz nga samtang nagpaabot sa pagpalit, nakig-alayon sila sa Cosmopolitan Funeral Homes Inc., nga nagtugot kanila sa pagsunog sa ilang nasakmit nga ilegal nga drugas nga libre.
Hinuon giangkon ni Ortiz nga magdepende gihapon sila sa availability sa makina sa maong establisemento.
Matod ni Ortiz nga adunay ubang pribadong entidad nga nagtanyag niini nga serbisyo, apan kinahanglan nga mobayad sila.
Alang niya, kon aduna na silay kaugalingong incinerator, makagahin sila og dugang pundo alang sa ilang operasyon sa ilegal nga drugas tungod kay dili na sila kinahanglang mogasto pa sa pagsunog sa drugas.
Sayo niini niadtong Martes, Nobiyembre 29, ilang giguba ang P256.4 milyones nga balor sa ilegal nga drugas, sama sa shabu, pinaugang dahon sa marijuana, nubain, ug ecstasy tablets.
