Personal nga nasaksihan sa mga lokal nga opisyal sa dakbayan sa Mandaue ang kapabilidad sa modernong kahimanan alang sa pagpatay sa sunog o ang firefighting drone equipment.
Lakip sa mga nakasaksi mao sila si Mandaue City Mayor Jonkie Ouano ug mga sakop sa konseho sa Mandaue alang sa fire demonstration gamit ang drone nga nagtumong sa pagpawong og sunog ilabi na sa mga tag-as nga building.
Matod pa ni Mayor Ouano , ang maong firefighting drone equipment gigama sa usa ka Taiwanese Company ug adunay kapasidad sa paglupad hangtud sa 100 metros sulod sa 45 minutos, ug gidesinyo alang sa firefighting sa mga tag-as nga building nga sagad makita sa mga highly urbanized nga dakbayan susama sa Dakbayan sa Mandaue.
Dugang pa niya, una unta kining ipakita sa Metropolitan Manila Development Authority (MMDA), apan personal siyang mihangyo nga ipakita una sa mga opisyales sa Mandaue City, sa sakop sa CCDRMO, ug sa mga fire marshalls nga anaa usab sa Mandaue Heritage Plaza.
Gitino ni Ouano nga anaa ang mga presensya sa mga personahe nga iyahang nabutyag aron makapaambit usab kini sa ilang tagsa-tagsa ka mga oberbasyon ug mga rekomindasyon.
Lakip sa gikabutyag ni Ouano mao ang safety measures niining maong ekipo, ug ingun man ang presyo, ug tun-an sa lokal nga kagamhanan ang proposal lakip na ang gastohan, safety measures, ug posible nga pag-abang og usa ka unit sa maong fire-fighting drone equipment sulod sa usa ka tuig, ubos sa rekomendasyon sa City Disaster Risk Reduction and Management Office ug Bureau of Fire Protection ug sa konseho sa syudad.
Samtang, nagtuo usab ang mayor nga aduna gayuy dakong panginahanglan sa pagsagop sa modernong teknolohiya nga magamit sa pagrespondi sa sunog aron mas daghang kinabuhi ug kabtangan ang masalbar atol sa sunog.
