Kusganong gihimakak sa Olympic gold medalist nga si Hidilyn Diaz ang peke nga video nga nikatap online, diin giingong nag-endorso kini og online gambling app.
Matod ni Diaz, hinimo-himo ang video ug gigamit ang artificial intelligence aron masundog ang iyang tingog.
Sa kontrobersyal nga video, usa ka babaye nga sama ni Diaz ang naghatag og instructions kung giunsa ang pag-download sa aplikasyon sa sugal.
Apan sa usa ka post niadtong Martes, ang weightlifting champion niinsister nga dili siya ang unod sa video.
Giawhag usab ni Diaz ang publiko nga i-report ang misleading nga post aron mahunong ang pagkaylap sa mga sayup nga impormasyon.
Si Hidilyn Diaz ang labing unang Filipino nga atleta nga nakadaog og gold medal sa Olympics, human sa iyang kadaugan sa women’s 55kg weightlifting event sa Tokyo 2020.
Gawas sa iyang pasidungog sa natad sa isports, nailhan usab siya nga aktibong tigpamaba batok sa mga isyu sa katilingban ug tigpasiugda sa kabatan-onan ug edukasyon.
