CEBU CITY – Naaktohan ang usa ka pulis nga nag-pot session sulod mismo sa panimalay sa high value target sa probinsiya sa Sugbo sa gipahigayon nga operasyon sa CPPO-PIB kauban ang Public Safety Company kaganihang buntag sa Brgy Cansojong, dakbayan sa Talisay.
Giila ang maong pulis nga si SPO1 Cielo Bonite nga naka-assign sa Dumaguete Police station.
Gibutyag ni Police Supt. Mario Baquiran, ang commanding officer sa Public Safety Company nga ang subject sa ilahang operasyon naila nga si Frederick Go, 46 anyos ug giisip kini nga high value target.
Dugang pa niini nga niadtong nakalabay nga tuig pa nila gipaubos sa surveillance ang subject.
Sa bisa sa search warrant nga pirmado ni Hon. Judge Jerry Dicdican, gi-search sa mga operatiba ang panimalay sa subject giingong nakuha ang 45 grams nga shabu nga mikabat og kapin tunga sa milyon, dried marijuana, drug paraphernalia, nagkadaiyang klase sa armas ug usa ka explosive device.
Sa pagkakarun, naka-detain ang mga suspetsado sa CPPO holding cell samtang gi-asikaso ang kaso nga gipasaka batok kanila.
