CEBU – Gitawag nga usa ka ‘welcome development’ alang sa Department of Education Region 7 ang hingpit nga pag-inagurar ni Vice President Sara Duterte-Carpio niadtong Hunyo 19, 2022.
Matud ni Dr. Salustiano Jimenez, DEPED 7 Regional Director, nga hilabihan nila nga gikalipay nga mismong bise presidente sa nasud ang mahimong secretary sa departamento sa edukasyon.
Gani, una nang nagpadala ug ‘welcoming statement’ si outgoing DepEd Secretary Leonor Briones, diin nagpadayag ug kinatibuk-ang suporta alang ni Inday Sara sa tanang mga plano niini alang sa kaayohan sa educational system sa nasud.
Samtang, gipahibalo usab ni Dr Jimenez nga sa pagkakarun mukabat na sa 91% o kapin sa 3,700 ka mga pribado ug pangpublikong tunghaan sa Central Visayas ang nagpatuman na sa limited face-to-face classes.
Gumikan sa pagpaubos sa pipila ka mga lugar sa Alert Level 1 status, hayan target karun sa departamento ang 100% nga pagpatuman sa face-to-face classes sa school year 2022-2023.
