Gipamahayag ni Atty. Neri Colmenares, usa ka Human Rights Lawyer, nga angayang imbestigahan lang ang kabahin sa pagpamusil ug kagubot sa Senado niadtong Mayo 13.
Atol sa eksklusibong pakighinabi sa Bombo Radyo Cebu ni Atty. Colmenares, iyahang gikabutyag nga angayang adunay imbestigasyon sa maong panghitabo, ilabi na nga adunay daghang mga nitumaw nga pangutana kabahin ato.
Dugang niya, unang problema niini nga mapanglangtawan mao nga adunay proseso ug adunay warrant of arrest batok kang Senador Ronald ‘Bato’ dela Rosa, busa makwestyon gayud kung nganung gibabagan man ang execution.
Tataw pa ni Colmenares, sayud ang tanan nga si bisan kinsang indibidwal nga malutsan na og warrant of arrest aduna gayud kini reklamo bahin sa warrant ug ipanghimak nga wala kini nagbaton og bisan unsang kamatuoran.
Apan, giklaro niini nga nunot sa pagreklamo ug paghimakak nga way kamatuoran ang warrant of arrest ngadto sa Korte, gikinahanglang arestado kini.
Busa, nakakwestiyon siya kung nganung normal nga indibidwal lang ka, dakpon diretso kung aduna nay warrant apan kung usa ka Senador, nganung adunay lugway. Mao nga iyang gikabutyag nga angayan lang kining pahigayonan og imbestigasyon.
Ikaduhang gipunting ni Colmenares kung nganung angayan lang kining imbestigahan, mao nga unsay naka trigger sa kagubot.
Matod niya, basi sa unang gikabutyag nga gisulong kini sila sa mga personahe sa National Bureau of Investigation (NBI) dayun nipabuto sa armas, apan nasayran diay nga wala man diay nakasulod ang NBI sa Senate Building tungod kay anaa kini nahimutang sa GSIS building, ug himan-himan diay, ang pagbuto-buto gagikan raman diay sa Office of the Sergeant-at-Arms (OSAA).
Hinungdan nga daghang nahibong, bisan pa gani siya mismo, nahibong ug naglibog sa maong panghitabo.
Busa, dapat nga adunay imbestigasyon aron masuta kung si kinsa ang tukmang sad-an ug salarin sa maong kagubot, ug nganung dili tukmang ang mga nanggawas nga taho.
Ingun man gitataw usab ni Colmenares nga bisan adunay katungod ang NBI sa pag execute sa warrant, apan diay dili wala pasulda sa Senado.
