CEBU CITY – Patay ang usa ka negosyante og isda human kini nga nabanggaan sa usa ka sports car nga gimaneho sa usa ka inila nga car racer.
Nahitabo ang aksidente sa Archbishop Reyes Ave., Brgy Mabolo, dakbayan sa Sugbo.
Ang namatay giila nga si Philip Pogoy, 26 anyos ug residente sa Greenfields, Mandaue City, Cebu samtang ang suspek ang giila nga si David Go Lim, Sr. ang tag-iya sa DGL motorsports team ug igsuon sa negosyante nga si Peter Lim.
Sa eksklusibo nga pakighinabi sa Bombo Radyo kang traffic investigator PO2 Chaddie Jungoy, matud pa nga nagkadaiyang direksyon ang giagi-an sa duha hinungdan sa head on collision.
Basi usab sa mga nakasaksi sa insidente, giingong kusog pagpadagan sa suspek hinungdan nga nalagpot ang biktima ug nagkabali-bali ang bukog.
Dali usab nga gidala sa tambalanan ang biktima apan gideklara na kini nga dead on arrival.
Wala misurindir ang negosyante nga si Lim sa otoridad ug gibiyaan na lang niini ang sakyanan pipila metro gikan sa nahitaboan sa insidente.
Mipatim-aw usab sa Cebu City Traffic Office ang abogado sa pamilyang Lim nga si Atty Pedro Lesley Salva arun nga makig-areglo sa pamilya sa biktima.
Matud pa sa abogado nga anaa sa state of shock ang iyahang kliyente ug kasamtangan nga nagpahuway sa iyahang panimalay.
Sa pagkakarun, dili pa makadesisyon ang pamilya sa biktima kung magpasaka ba sila og kaso batok sa suspek.
