Misaka ang ihap sa mga gikatahong nangamatay tungod sa paghapak sa bagyong Aghon sa nasod.
Matud pa ni Office of the Civil Defense (OCD) spokesperson Edgar Posadas, 6 na ang gikatahong patay diin 1 lang ang kompirmado samtang 5 pa ang kasamtangang gi-verify.
Dugang pa, nga ang kompirmadong namatay mao ang 14-anyos nga babaye nga taga Misamis Oriental.
Nakaangkon kini og daghang samad sa lawas human naigo sa natumba nga kahoy.
Samtang, adunay 8 ka tawo usab ang gikataho nga naangol gikan sa Bicol ug Northern Mindanao base sa bag-ong datos sa National Disaster Risk Reduction and Management Council (NDRRMC).
Sa pikas bahin, anaa sa 36,143 ka mga tawo ang naapektuhan sa bagyo, kasagaran sa Calabarzon nga adunay 19,180 ka mga indibidwal ug sa Bicol nga adunay 10,349.
Kung diin anaa sa 16,426 ka tawo o anaa sa 4,076 ka pamilya ang gipabakwit sa mga evacuation center, kasagaran sa Calabarzon.
Aduna usab 5,614 ka tawo o 1,245 ka pamilya ang temporaryong nagpabilin sa ubang mga lugar.
Samtang 22 ka balay usab ang natala nga naguba sa Eastern Visayas.
Nabalik ang suplay sa elektrisidad sa 61 ka siyudad ug lungsod human makasinati og pagkawala sa kuryente.
