Misaka na sa 76 ang kinatibuk-ang ihap sa mga namatay human nakit-an ang dugang 41 ka mga patayng lawas sa sulod sa nasunog nga barko nga MV June Aster sa kadagatan sa Coron, Palawan, sumala sa Philippine Coast Guard (PCG).
Basi sa taho ni PCG Incident Commander Commodore Geronimo Tuvilla, lakip sa mga nakuha ang usa ka lungon nga adunay sulod nga patayng lawas sa tawo, ingon man ang patayng lawas sa usa ka iro.
Samtang, gikumpirmar sa Maritime Industry Authority (MARINA) nga luwas ug buhi ang kapitan sa M/V June Aster human miulbo ang sunog sa maong barko samtang mibyahe sa kadagatan sa Coron, Palawan.
Matud ni MARINA Regional Office IV Director Atty. Maximo Bañares Jr., nga mismong ang kompanya sa barko ang nagkumpirma nga nakaluwas ang kapitan apan wala pa kini nagpakita sa mga awtoridad.
Padayon nga gipangita sa ahensya ang kapitan aron makuha ang pamahayag niini ug mapa-ilawom sa imbestigasyon, kung diin posible kini mapahamtangan og administrative liability kung mapamatud-ang adunay napakyas sa maritime safety regulations.
Sa kasamtangan, padayon gihapon ang mga awtoridad sa operasyon aron sa pagpangita sa uban pang posibleng mga biktima sa maong trahedya.
