Misaka na sa 37 ang ihap sa mga nakalas tungod sa kusog nga magnitude 7.8 nga linog nga mitay-og sa Mindanao, sumala sa Office of Civil Defense (OCD).
Kadaghanan sa mga biktima naggikan sa rehiyon sa Soccsksargen ug Davao, samtang gatusan ang naangol ug liboan ka mga pamilya ang naapektohan sa maong katalagman.
Base sa situational report sa OCD nga gipagawas alas 6:00 sa buntag karong Hunyo 9, 2026, kinatibuk-ang 33 ka kinabuhi ang nawala sa Soccsksargen—lakip ang 18 sa Sarangani, 12 sa General Santos City, ug 3 sa South Cotabato, ug adunay upat naman ka dugang nga fatalities ang natala sa Davao Region.
Nasayran nga kadaghanan sa mga biktima naigo sa nangatumpag nga debris atol sa kusog nga pag-uyog.
Gawas niini, moabot sa 456 ka indibidwal ang nangaangol samtang upat pa ang kasamtangang gipangita.
Gibanabana nga 17,689 ka pamilya o 77,186 ka tawo ang naapektuhan sa Sarangani.
Tungod sa maong kadaut, dinalian nga gipailalom sa state of calamity ang General Santos City samtang padayon ang pagpadala og mga responder sa ubang dapit.
Base sa inisyal nga assessment, 9 ka tulay ug 19 ka dalan ang naguba, diin gibanabanang molapas sa ₱900 milyones ang danyos sa imprastraktura.
Sa pagkakaron, daghang mga residente ang nagdumili una sa pagpauli ug nagpabilin sa mga open areas tungod sa sunod-sunod nga aftershocks ug kahadlok nga basin mahugno ang ilang mga panimalay.
Tungod niini, gilantaw na sa kagamhanan ang pagtukod og mga temporaryong shelter ug tent cities alang sa mga bakwit.
Isip lakang sa pagsiguro sa kaluwasan sa mga tinun-an, gisuspinde una ang mga klase sa nagkadaiyang dapit karong adlawa, Hunyo 9.
