Misaka na sa unom ka mga patayng lawas ang nakuha sa mga otoridad gikan sa nahugno nga siyam ka andana nga building sa Angeles City, Pampanga.
Ang pagkakaplag sa ikaunom nga biktima nahitabo halos usa ka adlaw human usab nakuha sa mga rescue teams ang ikalima nga patayng lawas nga na-trap sa lalom nga bahin sa nahisgutang istruktura.
Padayon karon nga nakigbisog sa oras ang mga sakop sa Bureau of Fire Protection (BFP), kagamhanang lokal, ug mga volunteer teams sa gipahigayon nga search, rescue, and retrieval operations sukad pa niadtong Mayo 24 sa dihang kalit lang nga natumpag ang maong building.
Una nang gibutyag nga kadaghanan sa mga biktima ug sa mga nanga-trap mga construction workers nga temporaryong nagpuyo sa sulod sa maong dapit samtang nagpadayon ang konstruksyon.
Kahinumduman nga wala gisalikway ni Interior and Local Government (DILG) Secretary Jonvic Remulla ang posibilidad nga aduna pa’y dugang nga mga buhi ug makaluwas sa natumpag nga building, hinungdan nga mabinantayon apan paspas ang gihimo nga pagkalot sa mga otoridad.
Sa pagkakaron, nagpadayon pa ang makuting imbestigasyon sa structural integrity sa bilding ug gisusi na kung aduna ba’y mga pagsupak sa National Building Code ang tag-iya ug ang kontraktor niini.
