Misaka ngadto sa 188 ang ihap sa mga nakalas tungod sa kusog nga mga linog nga miigo sa amihanang baybayon sa Venezuela, sumala sa taho sa mga awtoridad niadtong Huwebes.
Gikataho ni Jorge Rodriguez, ang presidente sa National Assembly, nga moabot sa 1,520 ka mga samaran ang gidala sa mga tambalanan alang sa dinalian nga pag-atiman.
Samtang nagpadayon ang rescue operations alang sa kapin 200 ka tawo nga gituohang natabunan sa mga nangatumpag nga estruktura, anaa sa 157 ka indibidwal ang nagpabilin nga missing.
Nakatala na og 138 ka mga aftershocks sukad sa magsunoray nga magnitude 7.2 ug 7.5 nga linog nga niigo niadtong Miyerkules sa gabii, diin nagpahamtang usab kini ug tsunami warnings sa rehiyon.
Moabot ngadto sa 346 ka mga imprastruktura ang nangadaot, lakip na ang 250 ka mga bilding ug 20 ka mga shopping center, diin kasagaran niini nahimutang sa estado sa La Guaira.
Naapektuhan usab ang walo ka mga ospital hinungdan nga gibalhin ang mga pasyente ngadto sa ubang pasilidad. Tungod sa grabeng kadaot, naggahin ang gobyerno sa Venezuela og USD200 milyones nga special fund alang sa dinalian nga rekonstruksyon, human pormal nga nadeklarar ni Acting President Delcy Rodriguez ang nasudnong state of emergency.
