CEBU CITY – Gikumpirmar ni Cebu City Mayor Edgardo Labella nga usa ka inmate sa Cebu City Jail ang ika-unom nga namatay tungod sa coronavirus disease 2019.
Sa press conference nga gipahigayon karong hapon, gibutyag sa Mayor nga nasutang nag-positibo ang 41-anyos nga lalakeng inmate nga taga Brgy. Mambaling niadtong Sabado diin nadala pa kini sa hospital apan gibawi-an sa kinabuhi pagka-adlaw’ng Dominggo.
Subay niini, gimando na sa Mayor sa City Health officers og doctors sa paghimo sa massive swab testing sa prisuhan ingon man ang contact tracing sa mga naka-himamat og naka-uban sa maong detainee.
Matod ni Labella nga gipangandaman sa City Government ang mga posibilidad kung aduna pa’y mag-positibo sa COVID-19 sa city jail, hinungdan nga naka-andam na ang isolation facility alang sa posibleng mag-positibo.
Gani sa nagpadayong massive swab testing sa prisuhan, 199 niini ang na-test diin usa ang nasutang positibo karong hapon kinsa naka-isolate na kini. Subay sa maong sitwasyon, padayon ang pag-suspenso sa visitation sa prisuhan nunot sa COVID-19 crisis.
