CEBU CITY — Gihulagway sa Integrity Monitoring and Enforcemment Group Central Visayas (IMEG-7) nga huyang ang dagan sa kaso sa gituohang pagkalambigit sa mga 11 ka mga sakop sa Sawang Calero Police Station.
Kini human nga namatay sa pagpamusil kagabii ang biktimang si Ritchie Nepomuceno sa Brgy. Basak-Pardo, dakbayan sa Sugbo.
Pagkalabay sa pipila ka oras, napalgang patay sulod sa buhatan sa RPDEU-7 ang usa sa mga gipasanginlang pulis nga mao si Police Staff Sgt. Celso Colita kagabii.
Matud ni IMEG-7 chief Police Major Alejandro Batobalonos nga dako og tabang si Nepomuceno isip prime witness sa maong pasangil.
Gitugyan na lang karon ni Batobalonos ang dagan sa kasong criminal ug administrative ngadto sa Cebu Provincial Prosecutor’s Office sanglit nasang-at naman karon ang reklamo.
Dugang pa niini nga gusto untang ma-avail ni Nepomuceno ang witness protection program apan wala hinuon gumikan sa kataas, matud pa, sa proseso.
Apan mipasalig ang ilang habig nga ipadayon ang imbestigasyon karong naduso na man ang kaso batok sa nahibiling 10 ka mga sakop sa Sawang Calero Police Station.
