CEBU CITY Gi-klaro ni PMaj. Alejandro Batobalonos, ang hepe sa Integrity Monitoring and Enforcement Group (IMEG)- 7 nga wala kini nadawat nga hulga sa kinabuhi.
Kini subay na sa padayong pagdagan sa imbestigasyon sa kaso sa gibanhigang-patay nga vital witness nga si Ritchie Nepomuceno batok sa 11 ka mga pulis sa Sawang Calero Police Station.
Matud ni Batobalonos nga nabalaka lamang kini sa resulta sa imbestigasyon gumikan sa pagkamatay sa prime witness.
Gibutyag niini nga napasaka na sa prosecutor’s office ang criminal case batok sa maong mga police officers ug gihuwat nalang niini ang resolusyon.
Dugang pa ni Batobalonos nga dili usab hilabihan nga mabalaka gumikan kay aduna pay second complainant batok sa mga maong mga pulis.
Padayon matud pa kini nga makig-alayon sa lain pang mga reklamante ingun man gi-awhag sa opisyal nga dili mahadlok kung adunay mga reklamo batok sa mga pagpangabuso sa mga miyembro sa kapulisan.
Kini human nga gisiguro sa buhatan nga andam nga mutabang sa mga indibidwal nga nabiktima sa dili maki-angayon nga binuhatan sa kapulisan.
Hangyo lamang niini sa publiko nga mu-kooperar ug mutabang sa internal cleansing sa habig sa kapulisan tungod kay dako ang partisipasyon sa komunidad niini.
Kahinumduman nga gipusil-patay si Ritchie Nepomuceno kinsang prime witness batok sa 11 ka mga pulis sa Sawang Calero Police Station samtang nagpusil matud pa sa kaugalingon ang pulis nga gireklamo og pagpanglugos si PSSgt. Celso Colita pipila ka oras human ang insidente. (Bombo Rhealyn Acop)
