Gibag-o ni Presidente Ferdinand Marcos Jr. ang iyang baruganan bahin sa plano nga pagpasaka og impeachment complaint batok kang Bise Presidente Sara Duterte.
Sumala ni Palace Press Officer ug PCO Undersecretary Claire Castro, ang Presidente miingon nga kon ang impeachment complaint ipasaka, kini angay nga trataron sama sa imbestigasyon sa mga anomalosong proyekto sa flood control—walay gidapigan ug moagi sa hustong proseso.
Bisan wala niya direkta nga gisulti kon ang Presidente mosuporta o mobabag ba sa impeachment, si Castro miinsistir nga iyang respetuhon ang proseso ug ang bisan kinsa nga mapamatud-ang sad-an kay kinahanglan nga manubag.
Mahinumduman nga sa miaging mga tuig, gitawag ni Presidente Marcos ang impeachment batok sa bise presidente nga pag-usik sa oras. Sumala ni Castro, ang Presidente mahimong wala hingpit nga nakasabot sa gilapdon sa mga isyu nga gipasaka batok kang VP Duterte.
Gipasiugda usab sa Malacañang nga ang accountability ug hustong proseso kinahanglan ipatuman, ug ang imbestigasyon kinahanglan nga ipadayon basi sa ebidensya.
