Niabot sa 2.0 million MT ang importasyon sa bugas sa nasud sa unang lima ka buwan sa 2024, basi sa datos nga gipagawas sa Bureau of Plant Industry (BPI).
Sa maong datus, makita nga ang bugas nga gi-import sa Pilipinas misaka og 20.3% kon itandi sa volume sa bugas nga gi-import sa nasud sa unang lima ka buwan sa 2023.
Kini katumbas sa 1.97 milyon MT gikan sa 1.64 milyon MT sa miaging tuig.
Diin sa buwan lang sa Mayo, niabot sa 299,258.01 MT ang delivery sa bugas sa nasud.
Sa habig sa BPI, kini nagkanayon nga naka-isyu kini og kinatibuk-ang 4,066 ka sanitary ug phytosanitary import clearances ngadto sa mga accredited nga rice importers.
Nagpabiling nag-unang supplier sa bugas ang nasud sa Vietnam, diin naka-import kini og 1.44 milyones MT sa Pilipinas sa samang panahon.
Ang maong volume katumbas sa 72.9% sa tanang importasyon sa bugas sa Pilipinas.
Samtang, gawas sa Vietnam, ang nag-unang supplier usab sa Pilipinas mao ang Thailand, Pakistan, ug Myanmar.
