Masaligon si Nanette Castillo, inahan sa usa sa mga giingong biktima sa extrajudicial killings (EJK), nga si kanhi Presidente Rodrigo Roa Duterte manubag sa kasong iyang giatubang nga crimes against humanity.
Sa usa ka interbyu sa Bombo Radyo, gipahayag ni Castillo ang dakong paglaum sa iyang pamilya nga kumpirmahon sa ICC Pre-Trial Chamber ang kaso ni Duterte aron matapos kini sa hingpit nga husay ug mapanubag ang kanhi presidente.
Hugot usab nga gihimakak ni Castillo ang mga pahayag sa abogado ni Duterte nga si Atty. Nicholas Kaufmann.
Sumala sa inahan sa biktima, ang gisulti sa abogado pulos binuang.
Dugang ni Castillo nga daw ang langyaw nga abogado nga buta sa kamatuoran nahimo nang DDS tungod sa iyang pag-insister nga ihulagway si Duterte nga usa ka bayani.
Kahinumduman nga ang iyang anak nga si Aldrin gipatay sa wala mailhing mga mamumuno niadtong Oktubre 3, 2017 sa Manila.
Nahitabo ang insidente atol sa madugoon nga gubat batok sa droga sa miaging administrasyon.
Samtang nagpadayon ang imbestigasyon sa ICC, ang pamilyang Castillo nangayo og mga pag-ampo gikan sa publiko alang sa hustisya.
