CEBU CITY – Emosyonal ang usa ka inahan nga mihimakak sa iyahang kasayoran sa kalambigitan sa iyahang anak sa iligal nga drogas.
Gihimug-atan ni Lucilda ‘Connie’ Bas Gallarde, nga wala kini kasayoran sa pagpamaligya ug shabu sa iyahang anak, apan siya nasayod nga tig-gamitan kini ug iligal nga drogas.
Matud pa nga wala kini makasabot sa nahitabo, apan dili usab kini makapasangil sa mga pulis, ingon man sa iyahang anak.
Giklaro ni Mrs. Gallarde nga mipalayo ang iyahang anak sa ilaha human nga kini gipasanginlan nga asset sa mga pulis hinungdan nga nahadlok kini alang sa iyahang seguridad.
Sigon pa nga tinambagan gayud niya ang iyahang anak hinungdan nga wala kini kasayoran kung unsa ang nakatukmod niini nga misulod na sa pagpamaligya ug iligal ug drogas kung ugaling kini tinuod man.
Gipadayag sa ginang nga isip public servant, giingong dili niini madawat ang nahitabo kung ugaling mapamatud-an nga nagduwa ug iligal ang iyahang anak.
Kahinumdoman nga nasikop si Elmer Bas Gallarde sa gipahigayon nga anti-illegal drug operation diin nakuhaan kini ug tulo ka kilo nga shabu nga mikantidad ug P20.4 million.
