Dakong pagkakurat sa mga kawani sa crematorium sa dihang milihok ang gituohang patay na nga Indiano human kini gidala sa morgue aron i-proseso sa pag-cremate.
Giila ang lalaki nga Rohitash Kumar, 25-anyos, usa ka Indian local media, nga adunay deperensya sa pagdungog ug dili usab kini makalitok.
Niadtong Nobyembre 21, 2024, nawad-an sa panimuot si Rohitash tungod sa iyang epilepsy ug nag-seizure.
Hinungdan nga gidala kini sa Bhagwan Das Khetan (BDK) district hospital, usa ka ospital sa Jhunjhunu nga kabahin sa kasadpang estado sa Rajasthan sa India.
Ug daling mihimo og cardiopulmonary resuscitation (CPR) ang mga doctor, apan ilang nakita nga ni-flatline ang heart rate ni Rohitash sa electrocardiogram.
Imbes nga ang mga doktor sa ospital ang mohimo og post-mortem aron makompirmar ang hinungdan sa kamatayon ni Rohitash, gidiretso kini pagdala sa morgue.
Gikan sa morgue, gibutang siya sa funeral pyre aron sunugon o i-cremate subay sa tradisyon sa Hindu.
Apan sa wala pa nisiga ang kahoy, usa ka kawani sa crematorium ug kadtong nagbantay sa ritwal nga nakamatikod nga naglihok gihapon si Rohitash.
Gitan-aw dayon nila ug nadiskobrehan nga buhi pa siya ug naluwas kini sa tinuod nga kamatayon.
Sa inisyal nga imbestigasyon sa insidente, matod sa chief medical officer sa Jhunjhunu district hospital, nangandam ang mga doktor sa pagtan-aw sa postmortem report ni Rohitash, apan wala gyud nila gihimo ang maong proseso hinungdan nga gisuspenso ang tulo ka doctor tungod sa ilang pagpabaya./
