Nakarekord ang Indonesia og miabot sa 175,000 ka kaso sa Acute Respiratory Infections (ARI) sugod niadtong Agosto hangtod Setyembre sa mga lugar nga naapektuhan sa dakong sunog sa kalasangan ug kasagbotan.
Sumala sa Health Ministry sa maong nasod, naglakip kini sa kapin 40,000 ka mga bata nga nag-edad og ubos sa lima ka tuig gikan sa 63 ka distrito sa tulo ka probinsya.
Ang maong pagdako sa kalayo sa Sumatra ug Kalimantan ginatukmod sa grabe nga hulaw ug uga nga panahon, nga nagpahinabo usab og haze nga nakaapekto na sa mga silingang nasod sa Malaysia ug Singapore.
Aron mapugngan ug mapalong ang kaylap nga sunog, nag-deploy ang gobyerno sa Indonesia og kapin sa 54,000 ka mga personahe ug 64 ka mga aircraft.
Dugang pa, mitabang ang militar sa Japan pinaagi sa pagpadala og tulo ka CH-47 Chinook nga mga helicopter, mga tropang tigsuporta, ug usa ka barkong iggugubat aron magpahigayon og mga operasyon sa water-bombing sa mga lugar nga nasunog sa Kalimantan.
