Nagbuntagay sa pagpakigbatok sa makaduhang higayon sa dako nga sunog sa isla sa Borneo ang mga Indonesian volunteer firefighter.
Nahitabo kini samtang nagtinabangay sulod sa pipila ka semana aron masumpo ang halapad nga sunog nga nagdala og baga nga aso o haze nga nakasulod na sa sidlakang bahin sa Malaysia, Singapore, ug Pilipinas.
Gipadayon nila ang pagpanalipod sa kalasangan gamit ra ang simpleng gumboots, usa ka gamay nga water pump, knapsack sprayers, ug unom ka hose nga gipalit pinaagi sa pondo sa ilang kompanya nga usa ka environmental NGO.
Ang mga medical mask ra usab ang nadawat gikan sa local clinic, diin matud pa, bisan og kulang kaayo ang ilang kagamitan ug wala sila’y pormal nga pagbansay, kinahanglan silang molihok dayon kay kon maghulat pa sila sa kumpletong gamit, mas mokusog ug mokatap pa ang kayo.
