Nisaka ang inflation rate o ang gikusgon o katulin sa pagsaka sa kinatibuk-ang presyo sa mga produkto ug serbisyo sa nasud ngadto sa 4.1% niadtong Marso, sumala sa Philippine Statistics Authority (PSA).
Kini dungan sa pagsaka sa presyo sa lana ug transportasyon.
Kini mas paspas kay sa 2.4% nga inflation rate nga natala niadtong Pebrero ning tuiga.
Kung diin, aduna kini gamay nga pagsaka sa 2% ngadto sa 4% nga target nga inflation nga gitakda sa gobyerno ug sa forecast range sa Bangko Sentral ng Pilipinas (BSP).
Gipahibalo ni PSA USec. ug National Statistician Claire Dennis Mapa, nga ang inflation niadtong Marso 2026 mao ang pinakapaspas nga natala sa miaging duha ka tuig o sukad sa Hulyo 2024 diin ang inflation miabot sa 4.4%.
Usa sa mga nag-unang nakatampo sa kinatibuk-ang inflation niadtong Marso mao ang transport commodity nga anaa sa 9.9%, ang pinakataas sa miaging tulo ka tuig.
Nisaka usab ang presyo sa lana sukad nga ang US ug Israel milunsad og gubat batok sa Iran niadtong Pebrero 28.
Sumala sa PSA Chief, sukad niini misaka na ang presyo sa gasolina, diesel ingon man ang bayranan sa kuryente.
