Miubos ngadto sa 8.1 porsyento ang inflation rate sa Central Visayas niadtong Agosto 2026, gikan sa 8.7 porsyento niadtong Hulyo.
Apan mas taas kini kumpara sa 3.0 porsyento nga inflation nga natala sa rehiyon niadtong Agosto 2025.
Sumala sa Philippine Statistics Authority o PSA-7, ang paghinay sa inflation nag-una tungod sa mas hinay nga pagsaka sa presyo sa food and non-alcoholic beverages, diin miubos ngadto sa 8.5 porsyento ang inflation gikan sa 10.7 porsyento niadtong Hulyo.
Mitampo usab sa paghinay ang Restaurants and Accommodation Services, diin miubos ngadto sa 10.3 porsyento ang inflation gikan sa 11.1 porsyento.
Bisan pa niini, nagpabiling dakong contributor sa inflation ang pagkaon, nga mitampo og 3.42 percentage points sa 8.1-porsyentong regional inflation.
Sulod sa food category, cereals and cereal products ang mitampo og 1.39 percentage points, gisundan sa isda ug seafood nga 0.96 percentage point, ug mga utanon, tubers, plantains, cooking bananas ug pulses nga 0.57 percentage point.
Pinakataas usab ang inflation sa maong food groups sa vegetables ug uban pang commodities nga mikabat og 19.0 porsyento, 13.6 porsyento sa isda ug seafood, ug 11.2 porsyento sa cereals ug cereal products.
Matud sa PSA-7 Regional Director Wilma A. Perante, nagpabiling importante ang pagmonitor sa presyo sa mga nag-unang food commodities tungod sa ilang dakong epekto sa inflation sa rehiyon.
