Giinsistir sa Iran nga wala pa kini nakahimo og pinal nga desisyon alang sa posibleng kasabotan sa kalinaw sa Middle East, taliwala sa pahayag ni US President Donald Trump nga mapirmahan na kini sulod sa pipila ka adlaw.
Kusganong gisalikway sa Iran ang maong taho, sumala sa tigpamaba sa Iranian Foreign Ministry nga si Esmaeil Baqaei, bisan og aduna nay nauyonang bahin sa teksto, nabalda ang negosasyon tungod sa bag-ong mga kondisyon nga gipasulod sa Estados Unidos.
Gidugang sa media sa estado sa Iran nga dili angay tuohan ang pahayag ni Trump hangtod nga dili kini kumpirmahon sa Tehran.
Una nang giangkon ni Trump nga uyon na ang mga lider sa Iran, Israel, ug mga kaalyado sa rehiyon sa mga detalye sa maong kasabotan.
Sa pikas bahin, gipahayag ni Israeli Prime Minister Benjamin Netanyahu nga iyang nahisgutan kang Trump ang plano nga wagtangon ang nuclear materials ug gubaon ang missile capabilities sa Iran.
Tungod niini, padayong nagpasidaan ang Iran sa posibleng epekto sa ekonomiya sa kalibutan, partikular na sa seguridad sa Strait of Hormuz nga giilang usa sa labing importanteng ruta sa lana ug gas sa kalibutan.
