Gipahibalo sa Foreign Minister sa Iran nga si Abbas Araghchi nga ang Strait of Hormuz, usa sa labing importante nga ruta sa pangkalibutanong patigayon sa lana, magpabilin nga “hingpit nga bukas,” basta magpadayon ang ceasefire sa Middle East.
Sa usa ka post, miingon si Araghchi nga ang pag-agi sa tanang komersyal nga barko pinaagi sa Strait of Hormuz magpadayon nga walay babag samtang epektibo pa ang ceasefire.
Bisan pa niini, wala pay klaro kung unsang ceasefire ang iyang gipasabot, kung ang 10 ka adlaw nga kasabutan tali sa Lebanon ug Israel, o ang miaging duha ka semana nga ceasefire tali sa Iran ug Estados Unidos nga nagsugod niadtong Abril 8.
Agig tubag, positibo nga mitubag si Presidente Donald Trump sa pahibalo sa Iran, nga gitawag kini nga timailhan sa pag-uswag sa mga paningkamot alang sa kalinaw.
Sa iyang post, miingon si Trump og “SALAMAT!” ug midugang nga giila sa Iran nga ang maong agianan sa tubig “HINGPIT NGA ABLI UG ANDAM NA PARA SA HINGPIT NGA PAG-AGI.”
Apan, giklaro usab ni Trump nga ang naval blockade sa US batok sa mga pantalan sa Iran magpabilin nga epektibo hangtod nga mapinal ang usa ka kasabutan tali sa duha ka habig.
