Abli sa posibilidad sa usa ka diplomatiko nga panagpulong si Iranian President Masoud Pezeshkian sa Estados Unidos, nga nag-ingon nga ang dalan sa komprontasyon mas mahal ug walay pulos kaysa kaniadto.
Gihimo sa opisyal ang pahayag pipila ka oras sa wala pa mohatag og pahayag si US President Donald Trump, bahin sa sitwasyon sa gubat sa Iran, nga iyang gitawag nga usa ka “importanteng update.”
Sa sayo pa, giingon ni Trump nga ang Iran nangayo og ceasefire, nga gihimakak dayon sa Tigpamaba sa Ministry of Foreign Affairs sa Iran, nga si Esmaeil Baghaei.
Sa usa ka sulat nga gipagawas sa Iran, nga sobra sa 1,000 ka pulong ang gitas-on, gihisgutan ni Pezeshkian ang kasaysayan sa Iran sa pag-atubang sa mga pagsulong ug panagbangi, ug giinsistir nga ang Iran wala pa gyud magsugod og gubat.
Gipasiugda usab niya ang kamahinungdanon sa diyalogo tali sa duha ka nasud, nga adunay dako nga epekto sa umaabot nga mga henerasyon.
Giklaro usab ni Pezeshkian nga sila walay daotang kabubut-on ngadto sa ubang mga nasud lakip ang Amerika, Europa, o silingang mga nasud.
Gidepensahan usab niini ang mga pagbalos sa Iran batok sa Israel ug uban pang mga nasud sa Persian Gulf isip tubag sa gibuhat kanila, apan, wala niya gihisgutan ang pag-abli sa Strait of Hormuz nga hinungdan sa kagubot human kini gibabagan sa Iran.
