“Strava reveal naman diyan, sen.”
Mao kana ang “joke” nga birada ni Jake Ejercito human nagkatag na onlin ang CCTV footage nga nagpakita kang Senador Ronald “Bato” dela Rosa nga nagdagan ug niikyas sulod sa Senado samtang gigukod sa mga ahente sa National Bureau of Investigation (NBI).
Nag-viral ang video, nga nagpakita kang Dela Rosa nga kusog nga nagdagan sulod sa Senate building, diin nahitabo kini sa samang higayon nga mibalik siya sa trabaho human sa kapin unom ka bulan nga walay presensya niini.
Mahinumduman nga ang mga awtoridad nagserbisyo usab og warrant of arrest gikan sa International Criminal Court kalabot sa iyang giingong papel sa war on drugs sa administrasyon ni kanhi Presidente Rodrigo Duterte.
Sumala sa mga report, si Dela Rosa mahimo usab nga dad-on sa The Hague, Netherlands, diin nakabase ang ICC, kalabot sa usa ka kaso sa crimes against humanity nga may kalabotan sa war on drugs.
Pagbalik niya sa Senado, gisultihan ni Dela Rosa ang plenaryo nga giingong gibabagan siya sa mga personahe sa NBI sa pagsulod sa session hall aron isilbi ang warrant.
Miingon usab siya nga nasamdan ang iyang mga tudlo human siya gigukod sa mga awtoridad.
Samtang, ang insidente nakakuha usab og lain-laing mga reaksyon online—ang uban mikatawa sa nag-viral nga footage, samtang ang uban naghatag og mainit nga diskusyon bahin sa mainit nga isyu sa politika.
