CEBU – Hustisya ang singgit sa amahan ni Jennifer Vallespin dungan sa paghatod sa katapusang pahulayan sa anak niini kaganihang hapon.
Gihimug-atan ni Sunny Vallespin nga barugan niini ang hustisya arun nga makapahulay sa dayon ug mahimutang ang kalag sa iyahang anak kinsang namatay gumikan sa pagpanulis ug ingon man ang giingong pagpabaya sa Chong Hua Hospital.
Matud sa naasoy nga amahan nga lihukon gayud sa ilahang pamilya ang pagpasaka ug reklamo batok sa nahisgutang tambalanan kansang giingong nagpabaya sa ilahang trabaho.
Gibutyag ni Vallespin nga dakong kalapasan sa nahisgutang tambalanan ang wala pag-atiman sa iyahang anak nga kritikal ang kondisyon.
Sigon pa nga andam sila nga mubayad sa hospital bills, apan niadtong higayona wala pa sila masayod sa nahitabo ug kay didto man gidala sa naasoy nga tambalanan hayan gi-atiman unta gumikan kay usa ka emergency ang sitwasyon.
Gikasagmuyo sa amahan ang wala pag-atiman sa tambalanan sa iyahang anak kinsang kritikal ang kahimtang.
Kahinumdoman nga patay si Jennifer Vallespin human nga gitulis sa dakbayan sa Mandaue sa dihang naguroy kini sa motor sa mga tulisan, samtang samdan ang duha ka mga kauban niini niadtong Pebrero 22, adlaw nga Sabado.
Abli ang Bombo Radyo Cebu alang sa habig sa kadagkuan sa Chong Hua Hospital.
