CEBU – Tun-an ron sa kagamhanan ang pagpahimutang sa mga underground cabling facility (UCF) pinaagi sa usa ka joint venture agreement (JVA) tali sa dakbayan ug usa ka pribadong sektor.
Kini nitumaw atol sa usa ka online meeting sa mga utility companies uban ni Konsehal Gerry Guardo, chairman sa technical infrastructure committee (TIC), ug tinugyanan ni Mayor Mike Rama nga si Eng’r. Reymarr Z. Hijara.
Gipadayag sa mga nisalmot atol sa ilang panaghisgut nga maglisud ang matag utility company nga mag-inusarang mopahimutang sa ilang mga kable ilawom sa yuta.
Ug ilang gisugyot nga mas maayo pa ang common UCF, nga nauyonan ni Guardo subay sa duha ug tunga ka tuig niyang kasinatian isip chairman sa TIC ug kapin sab sa duha ta tuig isip vice chairman sa niaging administrasyon nga natahasan motagad sa mga “spaghetti wires.”
Gibutyag ni Guardo nga mas maayo nga makig-JVA na lang ang siyudad sa kompanya o’ consortium nga makapahimutang aning underground system.
Gisugyot niini sa mga utility companies nga magsinabtanay ug momugna sa maong consortium, kay kung dili, mangita ang dakbayan og grupo nga andam mobuhat niini.
