Sa kadaghan nimo nga mahimong ka-lookalike, mananap pajud!
Usa ka talagsaong anak araw o albino nga kalabaw ang nahimong instant celebrity sa Bangladesh human kini gibansagan sa mga lokal nga residente isip si “Donald Trump” tungod sa kolor bulawan nga bangs nga kapareho sa porma sa tupi sa U.S. President.
Ang kabaw nga mitimbang og halos 700 kilos, gipadako sa usa ka umahan sa distrito sa Narayanganj, dool sa kapital nga siyudad sa Dhaka.
Tungod sa talagsaong itsura niini nga puti ang panit, color-pink nga ilong, ug blonde nga buhok, paspas nga mikaylap sa social media ang iyang mga hulagway ug video, nga nahimong rason aron modagsa ang mga tawo gikan sa lagyong lugar aron lang maka-selfie kauban ang mananap.
Sumala sa tag-iya nga si Ziauddin Mridha, ang iyang manghud ang nakahuna-huna sa pangalang Donald Trump sa kabaw. Bisan paman sa kadako niini, gibutyag ni Mridha nga bootan ang kabaw ug dili kini agresibo.
Tungod sa pinasahing kondisyon, nanginahanglan kini og espesyal nga pag-atiman lakip na ang pagligo upat ka higayon sa usa ka adlaw ug pagkaon og upat ka higayon usab kada adlaw aron mapabilin ang himsog nga panglawas.
