Gihangyo sa mga awtoridad sa Dakbayan sa Sugbo si Gov. Pamela Baricuatro nga tugotan ang temporaryong pagsira sa Cebu South Bus Terminal (CSBT) sa Domingo, Enero 18, 2026, isip kabahin sa pagdumala sa trapiko ug mga pag-adjust sa transportasyon alang sa tinuig nga selebrasyon sa relihiyon ug kultura.
Sigon ni Konsehal Dave Tumulak, nga ang sugyot nagtumong sa pagpagaan sa kahuot sa mga dagkong dalan, pagpahapsay sa pampublikong transportasyon ug paghatag og gitudlo nga parkinganan alang sa mga opisyal ug mga emergency vehicle atol sa mga kalihokan sa Sinulog, ilabina sa palibot sa Cebu City Sports Center (CCSC) ug sa mga kasikbit nga lugar.
Gihangyo usab sa Dakbayan ang pagtugot sa Baricuatro nga ibalhin ang mga operasyon sa bus paingon sa habagatan ngadto sa South Road Properties (SRP) El Pardo/Industrial Road site sugod alas 3 sa buntag sa Enero 18, hangtod sa pagtapos sa mga kalihokan sa Sinulog.
Ang mga bus nga gikan sa habagatan magpadayon sa pag-operate apan mag-parking ug magkarga sa mga pasahero sa El Pardo area imbes sa CSBT.
Matud ni Tumulak miingon nga ang temporaryong pagsira kabahin sa mas lapad nga estratehiya sa transportasyon ug seguridad alang sa kapyestahan..
Dugang niini nga ang pagsulod sa CCSC hugot nga limitahan, hinungdan nga ang mga ambulansya, mga trak sa bombero, mga VIP ug mga importanteng opisyal sa siyudad, lakip ang mayor ug bise mayor sa Dakbayan sa Sugbo, lamang ang tugutan nga makasulod sa CCSC grounds.
Ang mga mayor ug uban pang mga opisyal gikan sa silingang mga siyudad ug munisipyo gilauman nga mo-parking sa ilang mga sakyanan sa CSBT kung kini mahaw-asan na sa regular nga operasyon sa bus.
