Gipahugtan ni Cebu City Mayor Nestor Archival ang mga lakang sa Kagamhanan sa Dakbayan batok sa African Swine Fever (ASF) human gipirmahan ang Executive Order No. 086, Series of 2026.
Ang EO nagpahamtang ug temporary ban sa entry ug exit sa mga buhi nga baboy, locally produced pork, pork products, ug swine by-products sulod sa Cebu City isip pre-emptive measure aron mapugngan ang pagsulod ug pagkaylap sa ASF.
Gihangop usab sa siyudad ang Provincial EO No. 39, Series of 2026 nga nagdili sa pagsulod sa live hogs, pork, ug pork products gikan sa Negros Island ug ubang ASF-affected areas nga gi-ila sa Probinsya sa Cebu.
Matod ni Mayor Archival, gikinahanglan ang maong lakang aron mapalig-on pa ang biosecurity protocols sa siyudad ug malikayan ang posibleng pagsulod ug transmission sa ASF.
Ubos sa maong mando, ang mga movements lang nga adunay autorisasyon gikan sa Department of Veterinary Medicine and Fisheries (DVMF) ug kompleto nga veterinary permits, shipping documents, laboratory certifications, ug ubang biosecurity clearances ang tugotan nga pasudlon, subay sa national law.
Gimugna usab ang Cebu City ASF Task Force kini aron masiguro ang implementasyon nga pagamugnahon sa DVMF.
Gikinahanglan ang tanang public markets, slaughterhouses, meat shops, supermarkets, groceries, restaurants, hotels, ug ubang establishment nga nagbaligya, nagproseso, nagtipig, o nag-distribute ug baboy ug pork products nga magmintinar ug kompleto nga dokumento nga nagpamatuod sa legal ug luwas nga source sa ilang produkto.
Gimando usab nga itaho dayon sa DVMF ug ASF Task Force sulod sa 24 oras ang bisan unsang gisuspetsahang kaso sa ASF o paglapas sa EO.
