Motukod ang kagamhanan sa Probinsya sa Sugbo sa Cebu Province Heritage Site Commission aron modumala sa pagpanalipod, pagkonserba, ug regulasyon sa mga heritage sites sa tibuok probinsya pinaagi sa Executive Order (EO) 79, Series of 2025.
Nagtumong Ang EO sa pagpadagan sa institusyon nga gimando ubos sa Cebu Provincial Heritage Site Ordinance aron masiguro ang parehas nga pagdumala, technical oversight,, ug policy coordination alang sa mga inisyatibo sa pagkonserbar sa heritage.
Gipirmahan ni Gov. Pamela Baricuatro niadtong Disyembre 12, 2025 ang maong mando. Sumala sa EO, ang Komisyon magsilbi nga pangunang awtoridad sa pagdumala sa tanang heritage sites nga gipanag-iya sa gobyerno sa probinsya ingon man sa mga pribadong gipanag-iya nga mga site nga pormal nga gibutang ubos sa pagdumala niini.
Kini usab mo-regulate sa mga kalihokan sa pagpahiuli, pagbag-o, ug konstruksyon sulod sa mga heritage sites pinaagi sa pag-isyu sa mandatory clearances sa dili pa magsugod ang bisan unsang trabaho.
Ang mga miyembro niini naglakip sa mga representante gikan sa mga opisina sa probinsya, mga tsirman sa komite sa Provincial Board alang sa turismo, imprastraktura, arte ug kultura, kalikopan, ug edukasyon, ug mga representante gikan sa Philippine National Museum, University of San Carlos, ug Ramon Aboitiz Foundation Inc.
Gibutyag usab ni Aldwin Empaces, Assist. Provincial Administrator, nga lakip sa mga importanteng gimbuhaton niini mao ang pagrepaso ug pag-apruba sa mga plano sa arkitektura ug inhenyeriya, pagdumala sa mga proyekto sa pagpahiuli, pagtino sa gitugot nga paggamit sa mga kabtangan sa kabilin, ug ang pagmentinar sa usa ka gi-update nga rehistro sa tanan nga gideklarar nga mga lugar sa kabilin sa probinsya.
Gimandoan ang Komisyon usab sa pagdawat ug pagtimbang-timbang sa mga petisyon alang sa bag-ong mga deklarasyon sa mga lugar sa kabilin, pag-draft ug pagpatuman sa mga lagda ug regulasyon sa pagpatuman, ug pag-koordinar sa mga ahensya sa nasud, mga yunit sa lokal nga gobyerno, mga organisasyon sa katilingbang sibil, ug mga pribadong kauban aron mapalig-on ang pagpanalipod sa kabilin ug pag-promote sa kultura.
Gihimug-atan usab ni Empaces nga, importante nga matukod ang konseho gumikan kay sa konseho mismo desisyonan ang tanang angay buhaton maylabot sa herritage sites lakip na usab ang pagpundo niini.
