Pormal nga giselyohan sa Kagamhanan sa Probinsya sa Cebu ug Bohol ang makasaysayanong SugBohol Sisterhood Agreement Niadtong Biyernes, Hulyo 31, nga nagsaad sa mas hugot nga kooperasyon sa turismo, pamatigayon, pamuhunan, paglahutay sa katalagman, edukasyon, ug uban pang mga inisyatibo aron mapalambo ang pagtubo ug kalamboan sa rehiyon.
Si Cebu Gov. Pamela Baricuatro ug Bohol Gov. Erico Aristotle Aumentado, mipirma sa kasabutan atol sa usa ka seremonya sa Ceremonial Hall sa New Bohol Provincial Capitol sa Tagbilaran City.
Sa iyang mga pakigpulong, gipasalamatan ni Gov. Baricuatro si Gov. Aumentado ug ang mga tawo sa Bohol sa ilang mainit nga pag-abiabi ug pagkabukas sa panag-uban, nga gihulagway ang kasabutan isip sinugdanan sa mas lawom nga kolaborasyon tali sa mga silingang probinsya.
Matud ni Baricuatro, nga nagpaabut siya sa mga oportunidad nga mamugna sa kasabutan sa sisterhood sa lainlaing mga sektor sa duha ka probinsya.
Si Gov. Aumentado, sa iyang bahin, mibutyag nga ang kasabutan gilauman nga mapalambo ang turismo sa inter-island tourism and economic development pinaagi sa paghiusa sa papel sa Cebu isip usa ka international aviation ug sentro sa negosyo uban sa mga atraksyon sa eco-cultural sa Bohol nga giila sa tibuok kalibutan ug UNESCO Global Geopark.
Uban sa kasabutan nga napatuman, si Gov. Aumentado miingon nga ang duha ka probinsya mopalig-on sa mga food supply chains mosuporta sa mga lokal nga negosyante, mopaambit sa labing maayong mga pamaagi sa pagdumala, ug mopalawom sa kooperasyon sa pagpanalipod sa kalikupan, digital governance, ug pagbaton og kalig-on batok sa klima ug kalamidad.
